Birna Brjánsdóttir, sem saknað hefur verið síðan aðfaranótt laugardagsins 14. janúar, er látin. Þyrluáhöfn Landhelgisgæslunnar fann lík Birnu eftir hádegi í dag.

Líkið fannst í fjöruborðinu við Selvogsvita í Ölfusi síðdegis í dag. Rannsóknarlögreglan telur að líkið sé af Birnu sem hefur verið saknað síðan aðfaranótt laugardags. Lögreglan telur yfirgnæfandi líkur á því að Birnu hafi verið ráðinn bani. Þetta kom fram á blaðamannafundi síðdegis þar sem lögregla tilkynnti um lífkundinn.

Kennslanefnd ríkislögreglustjóra vinnur að því að staðfesta hvort líkið sé af Birnu. Lögreglan gengu þó út frá því að svo sé. Aðgerðum á svæðinu er að mestu leiti lokið núna. Ekki liggur fyrir játning í málinu en tveir menn sitja í gæsluvarðhaldi grunaðir um að hafa orðið Birnu að bana.

Var saknað í rúma viku

Lögreglan lýsti fyrst eftir Birnu laugardagskvöldið 14. janúar en hún sást síðast á eftirlitsmyndavél við Laugaveg 31 klukkan 05:25 að morgni laugardags. Birna hafði verið úti að skemmta sér á skemmtistaðnum Húrra. Á sama tíma og hún sást síðast í eftirlitsmyndavél sást rauður Kia Rio bíll keyra framhjá.

Fjöldi fólks tók þátt í óformlegri leit af Birnu um síðustu helgi. Sú leit skilaði litlum árangri. Snemma á mánudagsmorgun, 16. janúar, auglýsti lögreglan eftir ökumanni rauða Kia Rio bílsins. Sama kvöld fannst skópar sem var í eigu Birnu og hún var í nóttina sem hún hvarf.

Ítarleg leit var gerð á svæðinu um nóttina en án árangurs.

Lífsýni sem fannst í bílnum úr Birnu

Daginn eftir, þriðjudaginn 17. janúar, staðfesti lögreglan að skipverjar á Polar Nanoq væru mögulega viðriðnir hvarf Birnu þar sem sést hefði til þeirra aka á rauðum bíl að skipinu.

Í framhaldinu óskaði lögreglan eftir aðstoð danskra yfirvalda að stöðva för togarans sem var kominn út úr íslenskri landhelgi. Sérsveitarmenn tóku svo yfir skipið miðvikudaginn 18. janúar og í framhaldinu voru tveir menn handteknir grunaðir um að búa yfir upplýsingum um hvarf Birnu.

Þegar að Polar Nanoq kom til hafnar í Hafnarfirði um klukkan 23 sama kvöld var búið að handtaka þrjá menn um borð. Þeir voru færðir til yfirheyrslu. Mennirnir voru í framhaldinu úrskurðaðir í tveggja vikna gæsluvarðhald. Þeir neita sök í málinu.

Í dag staðfesti lögreglan svo að lífsýni sem fannst í rauðu Kia Rio bifreiðinni var úr Birnu. Nokkrum klukkustundum síðar tilkynnti lögreglan að lík hennar væri fundið.