Mennirnir vistaðir á lögreglustöðinni við Hverfisgötu
Lögreglan er komin með farsíma mannanna tveggja sem voru úrskurðaðir í gæsluvarðhald í gær í tengslum við hvarfið á Birnu Brjánsdóttur. Vinna er hafin við að bera saman gögn úr símum mannanna.
Þetta sagði Einar Guðberg Jónsson, lögreglufulltrúi hjá lögreglunni á höfuðborgarsvæðinu, í samtali við RÚV í morgun. Í frétt RÚV kemur fram að mennirnir séu vistaðir á lögreglustöðinni við Hverfisgötu, en ekki á Litla-Hrauni, þar sem lögregla telur sig þurfa greiðan aðgang að þeim.
Fréttablaðið greindi frá því í dag að mennirnir hafi verið úrskurðaðir í varðhald á grundvelli 211. greinar almennra hegningarlaga, en sú grein fjallar um manndráp.
Sem fyrr segir er vinna hafin við það að bera saman farsímagögnum með það að marki að komast að því hvort símar mannanna hafi verið á sömu stöðum og sama tíma og sími Birnu, en ekkert hefur spurst til hennar í tæpa viku.
„Það er verið að vinna í því og var verið að vinna í því í allan gærdag og gærkvöld og við væntum einhverrar niðurstöðu úr þeirri vinnu í dag,“ segir Einar við RÚV.