Engin skipulögð leit að Birnu Brjánsdóttur hefur verið ákveðin í dag. Þetta segir Þorsteinn G. Gunnarsson, upplýsingafulltrúi Slysavarnarfélagsins Landsbjargar. Ástæðan er sú að búið er að skanna þau svæði sem lögreglan hefur fengið ábendingar um að leita á. Björgunarsveitirnar verða áfram þó í viðbragðsstöðu ef nýjar vísbendingar berast. Þorsteinn bendir á að leitinni verður haldið áfram og staðan geti breyst hratt. Núna er hinsvegar verið að meta hvar á að leita.

Eru í viðbragðsstöðu

„Ástæðan fyrir því að ekki er hafin skipulögð leit er sú að okkur skortir vísbendingar til að hefja hana. Við erum búin að klára þau svæði þar sem hafa verið vísbendingar. Það eru, miðbærinn, svæðið við Flatahraun, í Urriðaholti, hafnarsvæðið í Hafnarfirði og nú síðast á Strandarheiði. Ef einhverjar frekari vísbendingar munu beina okkur aftur á þessi svæði þá förum við þangað og höfum fólk til taks til þess. “

Þorsteinn segir að í dag, að öllu óbreyttu, verði megináhersla lögð á að vinna með lögreglunni út frá þeim ábendingum sem hafa borist og vega og meta það hvort og þá hvar verði leitað næst.

Búið er að kalla út aðgerðarstjórnendur björgunarsveita á Suðurlandi, Suðurnesjum og á Vesturlandi. „Við erum að horfa á málið í stóra samhenginu. Áætla mannafla, einangra svæði sem leitað hefur verið á og velta fyrir okkur næstu skrefum. Þá einnig hvernig leit verður háttað um helgina“.

Í gærkvöldi var notast við snjóflóðahund við leitina að Birnu á Strandarheiði. Snjóflóðahundar, ólíkt sporhundum sem rekja spor fólks, eru sérhæfðir í því að leita á minna afmörkuðu svæði og í snjó.

Þakklátur björgunvarsveitarmönnum

Þorsteinn vill ítreka að leitinni verður haldið áfram. Núna er hinsvegar verið að meta hvar á að leita. Þá vill hann koma á framfæri sérstöku þakklæti til björgunarsveitarmanna sem hafa margir sett líf sitt í biðstöðu síðustu daga. Hann bendir á að það að vera í björgunarsveit sé á vissan hátt fórnfýsi.

„Þó svo að við í íslensku samfélagi göngum að því sem gefnu að það sé hægt að kalla út björgunarsveitir hvenær sem er þá er ekki sjálfgefið í nútímasamfélagi að fólk hverfi frá störfum sínum, fjölskyldu og börnum til að sinna leitar- og björgunarstörfum. Fyrir það ber að þakka.“

Þá vill Þorsteinn koma sérstökum þökkum til vinnuveitenda björgunarsveitarmanna sem iðulega bregðast vel við og gefa viðkomandi frí til leitar- og björgunarstarfa þegar kallið kemur.

„Oft fær okkar fólk frí í vinnunni til að sinna þessum störfum án þess að dregin séu af þeim laun. Það er líka þakkarvert og ein af forsendum þess að við getum haldið starfinu gangandi.“