Mennirnir neita sök -verða ekki yfirheyrðir um helgina nema nýjar vísbendingar komi fram í málinu
Blóð er meðal lífsýna sem lögreglan fann í rauðu Kia Rio bifreiðinni, sem talin er tengjast hvarfi Birnu Brjánsdóttur.
Þetta staðfesti lögreglumaðurinn Einar Guðberg Jónsson í samtali við mbl.is Rannsókn lögreglu miðast nú að því að grænlensku skipverjarnir tveir sem sitja í gæsluvarðhaldi vegna málsins hafi myrt Birnu.
Þeir hafa að sögn Gríms Grímssonar, sem stýrir rannsókninni á hvarfi Birnu, verið yfirheyrðir mjög ört frá því að þeir voru handteknir. Þeir verða ekki yfirheyrðir um helgina nema fram komi nýjar vísbendingar.
Hinir grunuðu neita sök en útiloka ekki að hafa hitt Birnu nóttina sem hún hvarf. Þá vinnur lögreglan í því að afla frekari sannana á því að Birna hafi verið í bílnum.
Einar Guðberg vonast til þess að niðurstöðurnar úr greiningu á blóðinu sem og öðrum lífsýnum komi í ljós um helgina eða í byrjun næstu viku.
Í dag óskaði lögreglan eftir myndefni frá ökumönnum bifreiða sem eru með upptökubúnað og voru á ferli, einhverstaðar á suðvesturhorninu, frá klukkan 7 að morgni til 11:30 síðastliðinn laugardag þar sem rauður Rio Kia sést.
Enn sem komið er hafa engar ábendingar borist sem gangast við leitina að Birnu. Því viljum við ítreka skilaboð lögreglunnar.
Á morgun verður umfangsmesta leit í nágrenni höfuðborgarsvæðisins sem íslenskar björgunarsveitir hafa lagt í. Búið er að kalla út björgunarsveitir af öllu landinu og verður leitað að Birnu á öllu suðvestanverðu landinu frá því að birtir í fyrramálið.
