Rannsóknargögn úr rauðu Kia Rio-bifreiðinni sem lögregla lagði hald á á þriðjudag benda til þess að misindisverk hafi verið framið. Vísir greindi frá þessu í hádeginu og vísaði í heimildir sínar.
DV hefur reynt að ná tali af Grími Grímssyni hjá lögreglunni í morgun en án árangurs, en í samtali við Vísi vildi hann ekki tjá sig um málið.
Ekki kemur fram í frétt Vísis hvaða gögn benda til þess að misindisverk hafi verið framið, en grunur leikur á að skipverji um borð í Polar Nanoq hafi verið með rauða bílinn á leigu sem sást í myndbandsupptökunni frá Laugavegi kvöldið sem Birna Brjánsdóttir hvarf.
Ekki hefur fengist staðfest að bíllinn sem lögregla lagði hald og bíllinn sem sást á Laugavegi sé einn og sami bíllinn en í frétt Vísis kemur fram að lögregla hafi lagt hald á einn bíl af þessari tegund.
Tveir menn, sem handteknir voru í gær, eru í Héraðsdómi Reykjaness þar sem krafa lögreglu um gæsluvarðhald verður tekin fyrir. Ekki liggur fyrir hvort farið verði fram á gæsluvarðhald yfir þriðja manninum sem handtekinn var í gærkvöldi, en lögregla hefur frest fram á kvöld til að taka ákvörðun um það.