Facebook-síðu Polar Nanoq hefur verið lokað. Skipstjóri frystitogarans Julian Nolsø er umsjónarmaður síðunnar. Julian er frá Færeyjum líkt og stýrimennirnir, vélstjórarnir og kokkurinn. Þeir Grænlendingar sem eru um borð eru flestir hásetar og sinna fiskvinnslu um borð.
Togarinn kom að landi í gærkvöldi og voru þrír skipverjar fluttir í land, grunaðir um að búa yfir upplýsingum um hvarf Birnu Brjánsdóttur. Tveir voru úrskurðaðir í tveggja vikna gæsluvarðhald grunaðir um refsiverða háttsemi en sá þriðji err talinn vera hugsanlegt vitni í málinu.
Á Facebook var að finna síðu sem ætlað var áhafnarmeðlimum skipsins til að skiptast á skoðunum og fá upplýsingar. Julian hafði áður tjáð sig stuttlega við Stundina um að málið hefði komið honum í opna skjöldu. Myndum af skipverjum hefur verið dreift manna á milli og getur DV staðfest að hafa fengið nokkur skjáskot með myndum af skipstjóranum og öðrum Færeyingi þar sem fullyrt var að þeir hefðu verið handteknir vegna málsins. Það er ekki sannleikanum samkvæmt. Mennirnir sem handteknir voru eru eins og áður segir grænlenskir.
DV ræddi í gær við Hörð Björgvinsson sem þekkir vel til áhafnarinnar sem kvaðst vera í áfalli yfir hvarfi Birnu.
Hörður fór síðast um borð í frystitogarann síðastliðinn fimmtudaginn til að hitta Færeyingana sem sigldu skipinu til Íslands í síðustu viku. Þegar Hörður kom um borð voru Grænlendingarnir ókomnir. Þeir komu, hver úr sinni áttinni, með flugi til Íslands að kvöldi fimmtudags og á föstudaginn. Hörður gefur hér lesendum DV örlitla innsýn inn í lífið um borð og tengsl sín við skipverjanna.
„Ætli ég hafi ekki kynnst þeim árið 2003. Þetta eru nánast alltaf sömu mennirnir. Þá er ég að tala Færeyingana, þeir eru allir mjög nánir vinir mínir. Það hafa verið meiri mannabreytingar hjá Grænlendingunum. Ég þekki þá ágætlega og hef í raun og veru ekkert nema gott um þá að segja,“ sagði Hörður en viðtalið má lesa í heild hér.