Annar skipverjinn af grænlenska togaranum Polar Nanoq, sem leiddur var fyrir Héraðsdóm Reykjaness, nú fyrir hádegi var úrskurðaður í tveggja vikna gæsluvarðhald. Einar Guðberg Jónsson lögreglufulltrúi sagði í hádegisfréttum RÚV að úrskurður héraðsdóms verði kærður til Hæstaréttar.

Sjá einnig: Rauði Kia Rio-bíllinn: Fullyrt að rannsóknargögn bendi til misindisverks

Lögregla fór fram á fjögurra vikna gæsluvarðhald og verður úrskurðinum áfrýjað til að fá lengra varðhald yfir manninum. Þegar þetta er skrifað er ekki búið að taka fyrir gæsluvarðhaldskröfu yfir hinum manninum en úrskurður mun liggja fyrir á næstu mínútum.

Einar Guðberg sagði í fréttum RÚV að lögregla teldi sig hafa rökstuddan grun um að mennirnir tveir hefðu komið að hvarfi Birnu Brjánsdóttur aðfaranótt laugardags. Þegar Einar var spurður hvort þeir væru grunaðir um refsiverða háttsemi, sagði hann: „Já, við grunum þá um refsiverða háttsemi.“

Einar segir að lögregla þurfi lengri tíma til að rannsaka málið en þessar tvær vikur sem héraðsdómur úrskurðaði í hádeginu. Ekki liggur fyrir hvort farið verði fram á gæsluvarðhald yfir þriðja manninum sem var handtekinn í gærkvöldi, en lögregla hefur frest fram á kvöld til að taka ákvörðun um það.

Mynd: DV ehf / Sigtryggur Ari