Ákvörðun um varðhald yfir þriðja manninum liggur fyrir í dag
Báðir mennirnir sem leiddir voru fyrir Héraðsdóm Reykjavíkur um hádegið í dag voru úrskurðaðir í tveggja vikna gæsluvarðhald á grundvelli rannsóknarhagsmuna. Farið var fram á úrskurðinn í tengslum við rannsókn lögreglunnar á hvarfi Birnu Brjánsdóttur.
Í tilkynningu sem Lögreglan á höfuðborgarsvæðinu sendi frá sér rétt í þessu kemur fram að lögregla hafi farið fram á fjögurra vikna gæsluvarðhald. Hefur lögregla ákveðið að kæra gæsluvarðhaldsúrskurði héraðsdóms til Hæstaréttar.
„Mennirnir voru handteknir um hádegisbil í gær um borð í grænlenska fiskiskipinu Polar Nanoq líkt og fram hefur komið. Þriðji maðurinn var svo handtekinn um borð í skipinu í gærkvöld, en ákvörðun um hvort krafist verður gæsluvarðhalds yfir honum hefur ekki verið tekin. Ekki er unnt að veita frekari upplýsingar um rannsókn málsins að svo stöddu,“ segir lögreglan í tilkynningu sinni.
Einar Guðberg Jónsson lögreglufulltrúi sagði í hádegisfréttum RÚV að mennirnir væru grunaðir um refsiverða háttsemi.
Grímur Grímsson hjá rannsóknardeild lögreglu sagði við DV eftir hádegi að ákvörðun um hvort farið verði fram á gæsluvarðhald yfir þriðja manninum liggi fyrir seinni part dags.