Líf segir samstöðu í meirihluta borgarstjórnar um að hafna launahækkunum vegna úrskurðar kjararáðs
Ekki er búið að taka ákvörðun um með hvaða hætti Reykjavíkurborg mun bregðast við ákvörðun kjararáðs um hækkun þingfararkaups en ákvörðunin hefði að öllu jöfnu einnig átt að hafa áhrif á laun borgarfulltrúa. Líf Magneudóttir, forseti borgarstjórnar, segir að samstaða sé um það hjá meirihluta borgarstjórnar að laun borgarfulltrúa verði ekki hækkuð í samræmi við hækkun kjararáðs.
Sem kunnugt er ákvað kjararáð 29. október síðastliðinn að hækka þingfararkaup úr 762.940 krónum á mánuði í 1.101.194 krónur á mánuði. Ákvörðun kjararáðs olli miklum úlfaþyt og var kallað eftir því víða að Alþingi beitti sér og afturkallaði launahækkunina. Þannig sagði Dagur B. Eggertsson borgarstjóri á Facebook-síðu sinni að hækkunin væri fráleit og boðaði að hann myndi bregðast við með því að lækka sín laun og borgarfulltrúa einhliða, brygðist Alþingi ekki við.
Borgarfulltrúar eru á föstum launum sem nema 77,82 prósentum af þingfararkaupi. Fyrir hækkun kjararáðs nam sú upphæð 593.720 krónum. Borgarstjórn Reykjavíkur samþykkti 15. nóvember síðastliðinn tillögu um að laun kjörinna fulltrúa borgarinnar myndu haldast óbreytt líkt og þau voru fyrir ákvörðun kjararáðs og skal sú ráðstöfun standa yfir „þar til Alþingi hefur haft tækifæri til að bregðast við úrskurði kjararáðs, eða eigi síðar en til 31. desember nk. Bregðist Alþingi ekki við úrskurðinum er því beint til forsætisnefndar að gera breytingu á samþykkt um kjör og starfsaðstöðu kjörinna fulltrúa hjá Reykjavíkurborg.“ Á fundi forsætisnefndar borgarinnar 16. desember síðastliðinn var síðan samþykkt að framlengja þessa ákvörðun til 31. janúar 2017.
„Við munum ekki þiggja sömu hækkanir og alþingismenn fengu“
LÍf Magneudóttir, forseti borgarstjórnar, segir að enn sé ekki búið að taka ákvörðun um hvernig kjaramálum borgarfulltrúa verði háttað. „Við erum búin að ýta þessu svolítið á undan okkur. Við frestuðum því að taka ákvörðun til 31. desember síðastliðins og síðan aftur til 31. janúar næstkomandi. Ástæðan er sú að við vildum gefa Alþingi tíma og tækifæri til að taka ákvörðun um að snúa við úrskurði kjararáðs. Nú virðist sem sagt að þingið hyggist ekki breyta neinu í þessum efnum. Við höfum því látið teikna upp fyrir okkur ýmsar sviðsmyndir og reikna út í samræmi við þær. Við höfum meðal annars rætt í forsætisnefnd hvort við ættum að binda laun borgarfulltrúa við almenna launavísitölu, við þingfararkaup eða mögulega við sambærileg störf stétta innan Bandalags háskólamanna, svo dæmi séu nefnd. Verði niðurstaðan sú að laun borgarfulltrúa verði áfram hlutfall af þingfararkaupi mun það hlutfall lækka frá því sem nú er,“ segir Líf.
En er ekki hætt við að sömu aðstæður komi upp aftur verði laun áfram prósentutala af þingfararkaupi?
„Hingað til hefur þetta fyrirkomulag verið heppilegt, allt þar til í hruninu. Eftir það sátu þingmenn eftir í launum þar til nú að þessi gríðarlega mikla hækkun varð. Við erum hins vegar á leið með að endurskoða allt starfs- og launakerfi borgarfulltrúa í samhengi við fjölgun þeirra sem kemur til framkvæmda við næstu borgarstjórnarkosningar, árið 2018. Ég á ekki von á að þessi staða komi upp aftur innan þess tíma.“
Forsætisnefnd mun koma með tillögu að samþykkt um launakjör borgarfulltrúa. Líf segir ólíklegt að takast megi að ákvarða um launakjörin fyrir 31. janúar næstkomandi. Ástæðan er sú að vart muni vinnast tími til þess þar eð næsti reglulegi fundur forsætisnefndar borgarstjórnar sé föstudaginn 27. janúar næstkomandi og borgarstjórnarfundur sé boðaður 31. janúar. Það komi þó ekki að sök þar eð samþykkt borgarstjórnar hafi verið með þeim hætti að hækkun tæki ekki gildi í borgarkerfinu þar til forsætisnefnd hefði tekið ákvörðun um hvernig haga skuli launakjörum.
Líf ítrekar að ekki sé enn búið að taka ákvörðun um málið en hækkun kjararáðs muni ekki standa. „Við munum ekki þiggja sömu hækkanir og alþingismenn fengu.“
Er samstaða um það hjá borgarfulltrúum?
„Hjá meirihlutanum er það, já, en fólk er misánægt í borgarstjórn.“