Drónar, kafbátur og slöngubátar notaðir við leit – Sjálfboðaliðar haldi sig fjarri
Skórnir sem sjálfboðaliðar fundu vegna leitar að Birnu Brjánsdóttur við Hafnarfjarðarhöfn í gærkvöldi eru sömu stærðar og skórnir sem Birna notar.
Þetta kemur fram á vef Vísis. Þá eru þeir sagðir sömu tegundar og í sama lit og skórnir sem Birna var í aðfaranótt laugardags þegar hún hvarf. DV náði tali af Grími Grímssyni, yfirlögregluþjóni hjá rannsóknardeild lögreglunnar á höfuðborgarsvæðinu, sem staðfesti þetta. „Já, við teljum að þeir séu sömu stærðar,“ sagði hann.
Grímur segir að allir angar málsins séu til skoðunar og sagði hann meðal annars við Vísi að skoðað væri hvort skónum hafi verið komið eða hvort Birna hafi farið úr þeim þarna. Unnið er að því að nálgast myndbandsupptökur út myndavélum hjá Atlantsolíu og öðrum fyrirtækjum í nágrenninu.
„Þetta er staðurinn sem við erum að miða við og það verður farið um allt þetta svæði í leitinni, það liggur alveg fyrir,“ segir Grímur í frétt Vísis.
Fjölmennt lið er nú við leit á svæðinu og greindi RÚV frá því að notast sé við ómannaðan kafbát við leitina. Þá verður notast við dróna og slöngubáta við leitina í dag.
Þá greindi RÚV frá því í morgun – og hafði eftir Grími Grímssyni – að auknar líkur væru á því að skóparið sem fannst séu skór Birnu þó að sporhundur, sem björgunarsveitir notuðu í nótt, hafi sýnt svæðinu lítinn áhuga.
Þorsteinn Gunnarsson, kynningarfulltrúi Landsbjargar, sagði í samtali við DV í morgun að leit skipulögð leit hafi hafist klukkan 10.30. Þegar hann var spurður að því hvort Dr. Martens-skórnir sem fundust á svæðinu í nótt væru í eigu Birnu, sagði hann:
„Þetta er eina vísbendingin sem við höfum. Skórnir eru í rannsókn hjá lögreglunni. Getum ekki staðfest neitt.“
Þorsteinn staðfesti að mikið af myndavélum séu á svæðinu þar sem skórnir fundust og leitin fer fram í dag. „Það er verk lögreglunnar að fara yfir og skoða þessar upptökur.“
Þá hvetur Þorsteinn almenning eindregið til að aðstoða við leitina með því að fara út og leita eftir vísbendingum í nærumhverfi sínu. Þó eru sjálfboðaliða beðnir um að halda sig fjarri vettvangi.