„Það eru um hundrað manns við leit núna, flestir eru á hafnarsvæðinu í Hafnarfirði en svo eru nokkrir að fylgja eftir smá óljósri vísbendingu við Urriðakotsvatn. Það er ein af þessum vísbendingum sem þarf að tékka en eru ekki endilega hluti af leitinni,“ segir Þorsteinn G. Gunnarsson, upplýsingafulltrúi Slysavarnafélagsins Landsbjargar.
Í gær fundust skór við höfnina í Hafnarfirði hjá birgðastöð Atlantsolíu. Lögregla hefur staðfest að þeir séu í sömu stærð og Birna Brjánsdóttir notar. Þorsteinn segir í samtali við DV að kafarar séu til taks en þeir hafi ekki leitað í höfninni.
„Við erum með kafara á svæðinu en þeir hafa ekki verið notaðir en aftur á móti erum við með slöngubáta sem fara með fram kantinum og lóninu. Við erum með dróna og fleira sem nýtist okkur í leit.“
Þá er eins og áður segir lítill hópur að fylgja eftir óljósri vísbendingu við Urriðakotsvatn. Ekki er leitað í vatninu sjálfu.
„Þetta er erfið leit. Vanalega þegar verið er að leita að týndri manneskju á fjöllum þá er vitað hvert manneskjan fór og hún sé einhver staðar á því svæði, en við höldum áfram að gera allt sem í okkar valdi stendur til að verða að liði,“ segir Þorsteinn sem hvetur sjálfboðaliða til að halda sig fjarri vettvangi en leita frekar í sínu nærumhverfi.
