Lögreglan á höfuðborgarsvæðinu hefur boðað til blaðamannafundar vegna leitarinnar að Birnu Brjánsdóttur. Ekkert hefur spurst til Birnu síðan aðfaranótt laugardags og hefur umfangsmikil leit í dag ekki skilað neinum árangri.

Skipulögð leit sérhæfðra leitarhópa björgunarsveita stendur nú yfir í miðbænum þar sem síðast sást til Birnu. Lögreglan óskaði fyrst eftir aðstoð björgunarsveitanna við leitina að Birnu í gærkvöldi, en sem fyrr segir hefur ekkert spurst til hennar í rúmlega tvo sólarhringa.

Í frétt DV.is kom fram að forgangsverkefni hjá lögreglunni í dag sé að verða sér úti um fleiri myndir úr eftirlitsmyndavélum í miðbæ Reykjavíkur.

Blaðamannafundurinn hefst klukkan 17.