Vonast til að hún finnst sem fyrst -heil á húfi
„Við erum harmi slegin yfir hvarfi Birnu,“ segir Jón Mýrdal eigandi Húrra sem er skemmtistaðurinn þar sem Birna Brjánsdóttir var með vinum sínum skömmu áður en hún hvarf sporlaust í miðbæ Reykjavíkur aðfaranótt 14 janúar.
Rúmlega tveir sólarhringar eru frá því að síðast spurðist til Birnu. Jón vill koma því á framfæri að hann ásamt starfsfólki Húrra hafi verið í sambandi við móður Birnu og látið henni, sem og lögreglunni, í té allar upplýsingar sem þau hafi í málinu.
Þetta kemur fram á Facebook síðu Jóns. Þá segist hann vonast til þess að Birna finnist sem fyrst, heil á húfi.
Líkt og fram hefur komið sást Birna í eftirlitsmyndavél ganga ein síns lið frá Húrra, austur Austurstræti, upp Bankastræti og Laugaveg að húsi númer 31. Þar hvarf hún sjónum klukkan 05:25. Ekkert hefur spurst til hennar síðan.
Matthildur Soffía Jónsdóttir, vinkona Birnu sagði í samtali við DV í morgun:
„Við vorum saman þetta kvöld. Ég fór fyrr heim en Birna ákvað að vera áfram. Við þekktum fullt af fólki þarna, þetta er svo lítið land. Þegar ég vaknaði daginn eftir var mér sagt að hún hefði ekki mætt í vinnuna. Sem er mjög ólíkt henni. Í framhaldinu byrjuðum við að leita.“
Í hádeginu fór af stað skipulögð leit sérhæfðra leitarhópa björgunarsveitanna á svæðinu þar sem Birna sást síðast. Leitað er 10 til 12 manna hópum. Tugir björgunarsveitarmanna eru í miðborginni.
