Gessica Notaro varð fyrir árás fyrir utan heimili sitt
Gessica Notaro, sjónvarpskona á Ítalíu og fyrrverandi keppandi í Ungfrú Ítalía, þarf að gangast undir aðgerð vegna alvarlegra meiðsla sem hún hlaut þegar sýru var hellt yfir andlit hennar. Ítalskir fjölmiðlar greina frá því að spjótin beinist að fyrrverandi kærasta Gessicu, Jorge Edson Tavares, en sjálfur hefur hann neitað þeim ásökunum.
Ítalska blaðið La Stampa greindi frá því í vikunni að Gessica hefði hlotið djúp brunasár á andliti eftir árásina sem átti sér stað fyrir utan heimili hennar, og að tvísýnt sé um það hvort hún haldi sjón á öðru auga. Þá hlaut hún einnig brunasár á mjöðm og fótlegg. Hún dvelur nú á sjúkrahúsi í borginni Cesena.
Að sögn ítalskra fjölmiðla voru Gessica og Jorge hætt saman en eftir að sambandinu lauk í ágúst síðastliðnum er hann sagður hafa áreitt hana ítrekað. Að lokum fór það svo að Gessica fékk nálgunarbann á hann. Jorge var handtekinn eftir árásina, grunaður um verknaðinn, og er hann í haldi lögreglu.
Gessica var krýnd Ungfrú Romagna árið 2007 og sama ár tók hún þátt í Ungfrú Ítalía. Í kjölfarið vann hún í sjónvarpi auk þess að vinna fyrir sér sem söngvari og dansari. Frá árinu 2014 hafði hún unnið í dýragarði þar sem hún sá um að skemmta áhorfendum á höfrungasýningum. Þar kynntist hún títtnefndum Jorge.