Inflúensufaraldur breiðist nú út um Evrópu og hefur Frakkland orðið mjög illa úti. Svo alvarleg er staðan raunar að franski heilbrigðisráðherrann hefur beint þeim tilmælum til sjúkrahúsa þar í landi að framkvæma ekki aðgerðir nema bráða nauðsyn beri til svo pláss sé fyrir sjúklinga sem þurfi á meðferð vegna inflúensu að halda. Tugir Íslendinga eru í Frakklandi að fylgjast með handboltalandsliði karla sem tekur þar þátt í heimsmeistaramótinu. Embætti landlæknis telur þó ekki ástæðu til að gefa út sérstaka viðvörun vegna ferða til Frakklands.

Ástandið í Frakklandi er með þeim hætti að sjúklingar veikir af inflúensu hafa þurft að bíða í allt að sólarhring þar til hægt er að meðhöndla þá. Í flestum tilfellum er um eldra fólk að ræða og hefur biðin haft það í för með sér, að sögn talsmanna hjúkrunarfólks í Frakklandi, að fjöldi fólks sem hefði verið hægt að hjálpa hefur látist vegna inflúensunnar.
Talið er að faraldurinn muni ekki ná hámarki fyrr en í næstu viku. Samkvæmt því sem haft er eftir heilbrigðisráðherranum Marisol Touraine eru óvenjumargir nú alvarlega veikir og varar hún við því að fjöldi manns kunni að láta lífið. Í hitteðfyrra kostaði inflúensufaraldur yfir 18 þúsund manns lífið í Frakklandi að því er kemur fram í frétt danska ríkisútvarpsins.

Þórólfur Guðnason sóttvarnarlæknir sagði í samtali við DV að ekki sé talin ástæða til að vekja sérstaka athygli á stöðunni í Frakklandi hér á landi. Íslendingar ferðist víða og þrátt fyrir að heimsmeistaramótið í handknattleik fari nú fram í Frakklandi telji heilbrigðisyfirvöld ekki ástæðu til að vara sértaklega við inflúensufaraldrinum þar í landi.