„Ég kannast alveg við að hafa heyrt kvartanir en á þessu stigi vil ég ekki tjá mig frekar um þetta mál. Eins og alþjóð veit þá er Brynjar ekki nákvæmur maður og freistar þess við hvert tækifæri að fara með gamanmál á minn kostnað. Það er alveg ljóst að þessu verður svarað á heppilegum vettvangi,“ segir nýskipaður utanríkisráðherra, Guðlaugur Þór Þórðarson, í samtali við DV.

Ástæða samtalsins er sú að sama dag og tilkynnt var um ráðherraskipan ríkisstjórnarinnar birti alþingismaðurinn Brynjar Níelsson færslu á Facebook-síðu sinni þar sem hann gantaðist með að fjölmargir Sjálfstæðismenn, einkum ökumenn og gangandi vegfarendur, legðu ríka áherslu á að Guðlaugur Þór yrði ráðherra. „Þeir segjast ekki sjá eftir þeim kostnaði sem fer í ráðherrabílstjóra fyrir hann,“ sagði Brynjar í færslunni.
Færslan féll í góðan jarðveg en þó virtust ekki allir skilja brandarann. Þannig spurði einn góðborgari hvort Guðlaugur Þór væri ekki með bílpróf og því svaraði Brynjar: „Jú, það er einmitt vandamálið.“

Að kvöldi þess sama dags var síðan loks tilkynnt um ráðherraskipanina. Brynjar lét opinberlega í ljós óánægju sína með hana, sérstaklega að reynsla og umboð hafi ekki ráðið för frekar en „kynjasjónarmið“. Hins vegar varð honum og ástríðufullum áhugamönnum um íslenska umferðarmenningu úr ranni Sjálfstæðisflokksins að ósk sinni þegar Guðlaugur Þór fékk úthlutað utanríkissráðuneytinu og þar af leiðandi bílstjóra.