Síðskeggjaður, hvíthærður maður hefur að undanförnu reynt að gefa nemendum í nágrenni Grundaskóla á Akranesi trúarrit. Til þess hefur hann enga heimild. Skessuhorn greinir frá þessu.
Maðurinn mun ekki hafa sýnt af sér ógnandi hegðun eða reynt að bjóða þeim aðra hluti en Nýja-testamenntið. Fram kemur að hann aki jafnan á brott þegar hann verður var við starfsfólk skólans. „Við lítum þetta mál alvarlegum augum og gerum allt sem í okkar valdi stendur til að ná tali af þessum manni og gera honum grein fyrir því að við viljum að hann láti af þessari iðju,“ er haft eftir Flosa Einarssyni, aðstoðarskólastjóra Grundaskóla.
Gæsla í kring um skólann hefur verið hert vegna þessa.