Mótmæli Jökuls og Þorsteins höfðu áhrif

Hópur fólks sem eru í forsvari fyrir fyrirtæki og rekstur í Dalvíkurbyggð hvatti yfirstjórn Húsasmiðjunnar í byrjun mánaðarins til að endurskoða þá ákvörðun að loka útibúi verslunarinnar á Dalvík. Í frétt DV frá 5. janúar var greint frá því að verslunin hefði þjónað verktökum og íbúum á svæðinu frá Akureyri og út á Siglufjörð. Þeir sem skrifuðu meðal annars undir yfirlýsinguna voru Jökull Bergmann, fjallaleiðsögumaður og framkvæmdastjóri Bergmenn ehf, Þorsteinn Már Baldvinsson forstjóri Samherja, Róbert Guðfinnsson fjárfestir og Bjarni Theódór Bjarnason sveitarstjóri í Dalvíkurbyggð.

Var því haldið fram í yfirlýsingunni að um væri að ræða mikið hagsmunamál fyrir fagaðila í byggingariðnaði og tengdum störfum og mikill tími og fjármunir myndu tapast við ferðir til og frá Akureyri.

Jökull greinir frá því í dag að honum hafi borist mikil gleðitíðindi en yfirstjórn Húsasmiðjunnar hefur ákveðið að fresta flutningu um eitt ár og endurmeta stöðuna þá hvort forsenda sé til að halda rekstri áfram. Því reynir á samstöðumátt fólks í Dalvíkurbyggð. Í skeyti frá forstjóra Húsasmiðjunnar segir:

„Nú hefur verið ákveðið að fresta lokun verslunarinnar á Dalvík. Við látum á reksturinn reyna á árinu og sjáum hvort við og samfélagið á Dalvík náum að rífa reksturinn upp og skjóta styrkari stoðum undir verslunina. Við erum sammála ykkur með það að ef stórir og smáir aðilar á svæðinu taka sig saman og versla meira í heimabyggð verður grundvöllur verslunarinnar að líkindum tryggður.“

Um þetta segir Jökull:

„Nú reynir á okkur öll að styrkja og styðja við verslun í heimabyggð og sýna samstöðumátt okkar í verki.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.