Jón Trausti Lúthersson sagður hafa hvatt Svein Gest áfram
Sveinn Gestur Tryggvason og Jón Trausti Lúthersson neita því að hafa ráðist á Arnar Jónsson Aspar. Þeir segja að þeir hafi einungis verið að sækja garðverkfæri til Arnars og þá hafi hann að ástæðulausu ráðist að þeim vopnaður kústskafti. Þeir segja að Arnar hafi svo veist að þeim með járnröri og því hafi þeir séð sig knúna að verja sig.
Þetta kemur fram í gæsluvarðhaldsúrskurði Sveins Gest sem var staðfestur í gær af Hæstarétti. Líkt og hefur komið fram var Jóni Trausta sleppt úr haldi í gær meðan Sveinn Gestur skal sæta gæsluvarðhaldi til 21. júlí.
Framburður vitna af manndrápinu samræmist ekki þessari lýsingu þeirra um málsatvik umrætt kvöld í Mosfellsbæ. Snapchat-upptökur bendi fremur til þess að þeir hafi ráðist að tilefnislausu á Arnar, líkt og lögreglustjóri telur. Samkvæmt vitnum þá kom til átaka áður en Arnar sótti kúst til að verja sig. Vitni sögðu enn fremur að Arnar hafi svo sótt járnrör og hafi hlaupið í átt að bíl sem að Sveinn Gestur og Jón Trausti voru í.
Þá hafi Jón Trausti tekið rörið af Arnari svo hann féll í jörðina og meðan Sveinn Gestur hélt honum á maganum, sló hann ítrekað í andlitið og hélt honum í hálstaki sem samkvæmt lýsingu vitna hafi varað í umtalsverðan tíma. Samkvæmt vitnum fylgdist Jón Trausti með þessu og hvatti Svein Gest áfram.
Samkvæmt bráðabrigðarniðurstöðu krufningar er talið að andlát Arnars megi rekja til hálstaksins. Það sé aðalþátturinn í andláti Arnars og því sé Jón Trausti laus úr haldi.