Flokksþing Framsóknarflokksins hefst á laugardag
Mikil titringur er í röðum Framsóknarmanna í aðdraganda flokksþings flokksins um helgina. Kosið verður í embætti á fundinum en ljóst er að í það minnsta tveir gefa kost á sér í stól formanns. Það eru Sigmundur Davíð Gunnlaugsson, sitjandi formaður, og Sigurður Ingi Jóhannsson, forsætisráðherra og varaformaður flokksins.
Miklir flokkadrættir hafa verið að teiknast upp innan flokksins eftir að Sigurður Ingi tilkynnti framboð sitt í síðustu viku. Þannig hafa þingmenn flokksins verið að raða sér upp í fylkingar bak við formannskandídatana síðustu daga.
Í gær birtust svo tvær skoðanakannanir sem sýna báðar að Sigmundur nýtur eilítið meiri stuðnings kjósenda Framsóknarflokksins í formannsstól en Sigurður Ingi. Í könnun sem stuðningsmenn Sigurðar Inga létu gera og Fréttablaðið birti kemur hins vegar í ljós að um 40 prósent stuðningsmanna annarra flokka segja að þeir væru líklegri til að kjósa flokkinn með Sigurð Inga í brúnni. Samsvarandi tala í tilfelli Sigmundar er aðeins 8,6 prósent. Í könnun Viðskiptablaðsins kemur einnig fram að stuðningur við Sigurð Inga er umtalsvert meiri hjá þeim sem styðja aðra flokka.
Í úttekt DV í dag kemur svo í ljós að áhrifafólk í öðrum stjórnmálaflokkum getur ekki hugsað sér að starfa með Framsóknarflokknum í ríkisstjórn undir forystu Sigmundar. Kosningin fer fram á sunnudaginn 2. nóvember og má búast við að úrslit liggi fyrir upp úr hádegi.