Eins og DV greindi frá í dag var árekstur á hringveginum, 11 kílómetra norður af Borgarnesi skömmu fyrir hádegið. Sjúkrabíll í forgangsakstri skall þá á fólksbíl sem verið var að beygja inn á Hvítárvallaveg.

Í tilkynningu frá lögreglu kemur fram að í sjúkrabílnum hafi verið sjúklingur. Hann hafi slasast í óhappinu og verið fluttur með þyrlu Landhelgisgæslunnar á Landsspítalann. „Farþegi í fólksbílnum slasaðist einnig og var hann fluttur með sjúkrabíl á sjúkrahús í Reykjavík, aðrir sluppu án teljandi meiðsla.“

Fram kemur að beita þurfti klippum til að ná farþega fólksbílsins út úr bílnum.

Nokkrar tafir á umferð urðu vegna vinnu á vettvangi.

Nánari upplýsingar um líðan fólksins liggja ekki fyrir.