Ákveðið hefur verið að selja íbúðir á nemendagörðunum á Hólum til að mæta rekstrarvanda Nemendagarða Hólaskóla. Alls stendur til að selja 38 íbúðir en fasteignamat þeirra er á þriðja hundrað milljónir króna. „Það var engin glóra í að halda þessu áfram svona,“ hefur RÚV eftir Víkingi Gunnarssyni stjórnarformanni.

Á íbúðunum hvíla lán frá Íbúðalánasjóði en þær voru byggðar fyrir rúmum áratug. Haft er eftir Víkingi að lánin hafi rokið upp og staðan sé vonlaus. Því hafi verið gripið til þess ráðs að selja um helming íbúðanna og fella niður lánin að verulegum hluta.

Nýtingin á nemendagörðunum hefur verið langt undir pari enda hafi spár um nemendafjölda í Hólaskóla ekki ræst. RÚV hefur eftir Víkingi að vonir standi til að allar íbúðirnar verði seldar á einu bretti, einhverjum sem starfi í ferðaþjónustu.