– 46 starfsmönnum bankans sagt upp og þar af 27 í höfuðstöðvum
Arion banki sagði í dag upp hópi starfsmanna. Haraldur Guðni Eiðsson, upplýsingafulltrúi bankans, staðfestir í samtali við DV að fyrirtækið hafi ráðist í hópuppsögn og að starfsmenn muni hætta hjá bankanum frá og með deginum í dag.
Vildi Haraldur ekki upplýsa hversu mörgum var sagt upp, úr hvaða deildum bankans eða af hverju bankinn ákvað að ráðast í aðgerðina. Sagði Haraldur að von væri á tilkynningu vegna málsins.
Fréttin uppfærð 15:55
Alls var 46 starfsmönnum bankans sagt upp. Í þeim hópi störfuðu 27 í höfuðstöðvum fyrirtækisins en 19 á öðrum starfsstöðvum. Eftir breytingarnar starfa um 840 manns hjá Arion banka. Vinnumálastofnun hefur verið greint frá starfslokunum samkvæmt tilkynningu Arion banka.
„Ýmislegt í umhverfi bankans kallar á breytingar á starfseminni. Veigamest er sú staðreynd að fjármálaþjónusta tekur umtalsverðum breytingum um þessar mundir. Viðskiptavinir kjósa í mun ríkari mæli að nýta sér sjálfsafgreiðslulausnir eins og bankaapp, netbanka og hraðbanka í stað samsvarandi útibúaþjónustu. Notkun appsins og hraðbanka í útibúum bankans hefur margfaldast á undanförnum árum. Vegna þessa hefur spurn eftir afgreiðslu í útibúum bankans dregist saman um þriðjung á tveimur árum. Þessi þróun kallar á breytingar og eru samhliða gerðar skipulagsbreytingar í útibúum bankans, án þess þó að útibúum fækki,“ segir í tilkynningu bankans.
„Breytingarnar nú eru liður í víðtækari aðgerðum til hagræðingar í rekstri bankans. Þrátt fyrir umfangsmiklar hagræðingaraðgerðir undanfarin ár og endurskipulagningu starfseminnar hefur fjöldi starfsmanna haldist nokkuð stöðugur vegna yfirtöku á öðrum fjármálafyrirtækjum og vegna aukinna umsvifa. Fækkun starfsfólks er þungbært skref að stíga en nauðsynlegt í ljósi breyttra áherslana í starfsemi bankans og ytri aðstæðna.“