H&M mun líklega opna í Smáralind seinni part næsta sumars og í miðbænum á Hafnartorgi árið 2018. Þetta segir Sturla Eðvarsson, framkvæmdastjóri Smáralindar, í Markaðnum í dag.

Eins og DV greindi fyrst frá í apríl síðastliðnum mun sænski verslunarrisinn opna tvær verslanir á Íslandi, en á þeim tíma lá ekki fyrir hvenær þær myndu opna.

Þó svo að H&M hafi ekki verið í boði fyrir íslenska neytendur hér á landi hafa verslanirnar notið mikilla vinsælda með íslensks almennings. Þannig greindi Fréttablaðið frá því fyrir skemmstu að Íslendingar hefðu keypt mest í H&M af öllum fatabúðum á fyrsta ársfjórðungi þessa árs. Var H&M með 17,7 prósenta markaðshlutdeild þrátt fyrir að vera ekki einu sinni á Íslandi.

Sturla segir í Markaðnum, fylgiriti Fréttablaðsins, í dag að nokkur atriði hafi haft áhrif á komu H&M til Íslands. Þannig séu jákvæð teikn á lofti í íslensku atvinnulífi, hagvöxtur er meiri en gengur og gerist og þá hafi fjölgun ferðamanna sem hingað koma sitt að segja.