Unglingspiltur er nú í haldi lögreglu eftir að hafa gert skotárás í grunnskóla í bænum Townville í Suður-Karólínu fylki, laust eftir hádegi í dag. Tvö grunnskólabörn og einn kennari særðust í árásinni. Annar aðili fannst látinn um það bil fimm kílómetra frá skólanum og er hann sagður vera faðir árásarmannsins.
Samkvæmt frétt AFP voru um 300 börn á aldrinum 4 til 12 ára í skólanum þegar árásin var gerð. Skólinn var í kjölfarið rýmdur og sérsveit lögreglu kölluð á vettvang sem handtók árásarmanninn. Í frétt CNN segir að óvíst sé hvort einhver tengsl hafi verið á milli árásarmannsins og grunnskólabarnanna tveggja sem urðu fyrir árásinni.
Grunnskólabörnin sem særðust eru ekki í lífshættu en þau voru flutt með þyrlu á sjúkrahús. Ekki kemur fram hvort kennarinn sem særðist sé í lífshættu eða ekki.
