Árið 2010: „Við erum hér að stefna á 40-50 prósent atvinnuleysi sem yrði bara frábært“
Smári McCarthy forsætisráðherraefni Pírata hefur verið gagnrýndur harðlega víða á samfélagsmiðlum eftir að brot úr gömlu viðtali var deilt á Facebook. Þar segir Smári meðal annars: „Við erum hér að stefna á 40-50 prósent atvinnuleysi sem yrði bara frábært. Svo lengi sem fólk geti lifað mannsæmandi lífi með einhvers konar framfærslu.”
Smári er oddviti Suðurkjördæmi og einn af stofnendum Pírata. Er hann í miklum metum hjá Birgittu Jónsdóttur sem telur að vinur hennar verði fyrirtaks forsætisráðherra. Þá hefur Smári sjálfur sagt:
„Ég er soddan nörd, það má setja mig hvert sem er. Ég hef mikinn áhuga á utanríkismálum, iðnaði og nýsköpun, samgöngum og fjarskiptum, en finnst líka ríkisfjármál óeðlilega spennandi. Gæti sennilega stýrt skipinu líka, ef til þess kæmi. Sjáum bara til.“
Viðskiptablaðið birti myndskeiðið sem er frá árinu 2010 og er klippt úr samræðum sem hann á við Jórunni Eddu Helgadóttur þar sem þau fara yfir kosti atvinnuleysis. Hafa Píratar sagt innihaldið afbakað af þeim sem klippti það til. Í einni klippunni segir Smári:
„ … Ég yrði bara helsáttur við það að vera atvinnulaus og hafa bara meiri frítíma.“
Smári svaraði í dag fyrir myndskeiðið í spjalli í Reykjavík síðdegis og segir að málið hafi verið mikilvægt og hann hafi komið því „asnalega“ frá sér. Hann kveðst ekki vonast eftir 40 til 50 prósent atvinnuleysi. Sagði Smári að ummælin væru mistök og hann vildi lítið atvinnuleysi.
„Það sem ég er að tala um þarna er í rauninni tvennt. Annars vegar það að fólk ætti að geta unnið miklu minna í dag. Þá á ég ekki við að að stór hluti samfélagsins verði atvinnulaus heldur það að fólk geti dregið úr vinnu sinni. Þetta er atriði sem við Píratar höfum lagt fram tillögu um, að vinnuvikan verði stytt úr 40 tímum í 35. Það er til að halda í við þá þróun sem hefur verið í Evrópu. Fólk er afkastameira og skilvirkara þegar það er úthvílt og hefur átt meiri tíma með fjölskyldu og vinum.“
Þorsteinn Sæmundsson þingmaður Framsóknarflokksins gefur þó lítið fyrir útskýringu Smára í Reykjavík síðdegis og segir:
„Píratar geriði svo vel. Smári McCarthy reynir (án árangurs) að útskýra firrt ummæli sín frá því fyrir 6 árum. Fram kemur í máli Smára að hann hefur engan skilning á því að hér á landi eru greiddar út örorku og ellilífeyrisbætur.“
Þá segir Smári enn fremur í Reykjavík síðdegis:
„Menn gera mistök og þetta var asnalega orðað hjá mér, ég viðurkenni það fúslega. Það er rosalega merkilegt að þetta myndband fer alltaf í dreifingu þegar það er verið að reyna að koma höggi á mig. Þetta er vissulega réttmæt gagnrýni því ég tala eins og vitleysingur þarna en ég vona allavega að ég nái að svara vel og í rauninni frábært að fá að tala um þessa stóru hluti því þetta er ekki eitthvað sem kemur upp í hefðbundinni pólitískri umræðu.”
Hér fyrir neðan má sjá myndskeiðið umdeilda sem klippt var og fór í dreifingu á Facebook en horfa má á samræður Smára og Eddu í heild sinni hér.. Þá má hlusta á Smára í Reykjavík síðdegis hér.
