Ráðstöfunartekjur íslenskra heimila jukust árið 2015 um 10,8% frá fyrra ári. Ráðstöfunartekjur á mann jukust um 9,6% milli ára og kaupmáttur ráðstöfunartekna á mann jókst um 7,9%.

Ráðstöfunartekjur heimilanna má skilgreina sem samtölu launatekna, eignatekna, tilfærslutekna og reiknaðs rekstrarafgangs einstaklingsfyrirtækja en að frádregnum eigna- og tilfærsluútgjöldum. Þetta segir í frétt á vef Hagstofu Íslands.

Á milli áranna 2014 og 2015 jukust ráðstöfunartekjur heimilanna um 9,5 prósent. Þar af var 10,7% aukning á heildarlaunatekjum, 12,9% aukning á heildareignatekjum og 11,4% aukning á rekstrarafgangi einstaklingsfyrirtækja.

Heildartilfærslutekjur jukust um 2,7% milli ára. Heildareigna- og tilfærsluútgjöld jukust um 7,5% milli ára vegna 9,1% meiri tilfærsluútgjalda, en eignaútgjöld drógust saman um 2%.