Bandaríkjamennirnir Stephan og Mike heilluðu starfsfólk þjóðgarðsins Snæfellsjökuls upp úr skónum í vikunni sem leið þegar þeir kynntu sig á bílastæðinu við Saxhól, báðu um ruslapoka og hreinsuðu svæðið með landvörðunum. Þeir félagar kolféllu fyrir landi og þjóð og eru nú þegar farnir að skipuleggja næstu Íslandsferð.
Þetta kemur fram í færslu á fésbókarsíðu Umhverfisstofnunar.
„Þeir sendu síðar tölvupóst með meðfylgjandi ljósmyndum og vildu láta landverðina vita að þeir hefðu haldið hreinsunarstarfinu áfram á ferðalaginu um Ísland og vildu líka koma þeim skilaboðum áleiðis að þeir vonuðust til að veita öðrum ferðalöngum innblástur til að sýna náttúru landsins virðingu með því að týna upp rusl“
segir í tilkynningunni um leið og stofnunin þakkar þeim félögum fyrir framtakið sem sé bæði heimamönnum og gestum lands og þjóðar til eftirbreytni.
Í athugasemdum við færsluna lofsama Mike og Stephen land og þjóð og segja minningarnar frá Íslandsförinni eiga eftir að lifa með þeim um ókomna tíð. Kveðst Mike vera þakklátur fyrir að hafa fengið að vera „hluti af Íslandi“ og segir íbúa og menningu landsins vera hreint ótrúlega.
„Landslagið var það sem dró okkur hingað en fólkið og minningarnar munu leiða okkur hingað á ný aftur og aftur! Við erum þegar farnir að skipuleggja næstu ferð,“ ritar hann og bætir við að hann vonist til þess að framtak þeirra muni hvetja aðra ferðamenn til að sýna ábyrgð og ganga um náttúruna af virðingu.
Stefan tekur í sama streng og lofsamar fegurð Íslands. „Okkur Mike brá lítilega þegar við sáum allt þetta rusl í verðmætu náttúrunni,“ segir hann og bætir við að einn daginn vilji hann gjarnan sýna börnum sínum Ísland en þar hafi hann eignast dýrmætar minningar. „Takk fyrir að leyfa okkur að heimsækja fallega landið ykkar. Þið eigið stað í hjarta mínu að eilífu.“