Hvorki Sigmundur Davíð Gunnlaugsson, formaður Framsóknarflokksins, né Sigurður Ingi Jóhannsson, forsætisráðherra og varaformaður flokksins munu flytja ræður á eldhúsdagsumræðum á Alþingi í kvöld. Báðir hafa þeir boðið sig fram til formanns á flokksþingi um næstu helgi.
Óhætt er að segja að miklar deilur hafi geisað innan Framsóknarflokksins um forystu flokksins og er því ljóst að formannsbaráttan mun verða dramatísk. Lilja Alfreðsdóttir utanríkisráðherra, Eygló Harðadóttir, félags- og húsnæðismálaráðherra og Karl Garðarsson munu flytja ræður fyrir hönd Framsóknarflokksins í kvöld samkvæmt upplýsingum frá Framsóknarflokknum en frá þessu greinir mbl.is.
Í tilkynningu frá Alþingi kemur fram að umræðurnarí kvöld muni skiptast í þrjár umferðir og hefur hver þingflokkur 10 mínútur í fyrstu umferð, 6 mínútur í annarri og 6 mínútur síðustu umferð.
Ræðumenn annarra stjórnmálaflokka verða eftirfarandi: Bjarni Benediktsson fjármálaráðherra, Ólöf Nordal innanríkisráðherra og Haraldur Benediktsson fyrir Sjálfstæðisflokkinn, Birgitta Jónsdóttir, Ásta Guðrún Helgadóttir og Helgi Hrafn Gunnarsson fyrir Pírata, Katrín Jakobsdóttir, Svandís Svavarsdóttir og Bjarkey Olsen Gunnarsdóttir fyrir Vinstrihreyfinguna – grænt framboð, Oddný G. Harðardóttir, Sigríður Ingibjörg Ingadóttir og Árni Páll Árnason fyrir Samfylkinguna og Óttarr Proppé, Björt Ólafsdóttir og Páll Valur Björnsson fyrir Bjarta Framtíð.