„Ég kannast ekki við neitt af þessu – mér var sem betur fer haldið utan við þessa ógeðslegu aðför – nú verður Sigurður Ingi að stíga fram og upplýsa hvaða þingmenn sátu á svikráðum við formann flokksins – það var í það minnsta ekki allur þingflokkurinn,“ skrifar Vigdís Hauksdóttir þingkona Framsóknarflokksins í stöðuuppfærslu á Facebook síðu sinni í dag.

Sigurður Ingi Jóhannsson sagði í viðtali í þættinum Sprengisandi á Bylgjunni í morgun að þegar hann mætti á þingflokksfund á þriðjudegi tveimur dögum eftir Kastljósþáttinn örlagaríka, þá hafi þingflokkurinn verið búinn að taka þá ákvörðun að biðja varaformanninn og þingflokksformanninn að fara til Sjálfstæðisflokksins og óska eftir áframhaldandi stjórnarsamstarfs en setja forsætisráðherrann af.

Sigurður Ingi hefur nú lýst því yfir að hann muni gefa kost á sér til formennsku í flokknum, en hann býður sig fram gegn sitjandi formanni Sigmuni Davíð Gunnlaugssyni.

Samflokkskona Vigdísar, Silja Dögg, virðist undrandi á færslunni og skrifar við hana „Varstu ekki á fundinum“?