Sigurður Ingi fer fram gegn Sigmundi Davíð
„Þetta er óvenjuharkalegt uppgjör sem er að verða innan flokksins en yfirleitt hefur það verið með öðrum hætti en að formaðurinn sé skoraður á hólm korteri fyrir kosningar.“
Þetta segir Eiríkur Bergmann, prófessor í stjórnmálafræði við Háskólann á Bifröst, í Fréttablaðinu í dag.
Eins og greint var frá í gær ætlar Sigurður Ingi Jóhannsson, varaformaður Framsóknarflokksins, að bjóða sig fram til formanns Framsóknarflokksins. Mun hann því fara gegn sitjandi formanni, Sigmundi Davíð Gunnlaugssyni.
Mikil spenna hefur verið í flokknum að undanförnu og mun framboð Sigurðar Inga ekki vera til þess að minnka hana. Sigurður Ingi sagði í kvöldfréttum RÚV í gærkvöldi að margir hefðu skorað á hann að bjóða sig fram og nú ætli hann að láta verða af því.
Í Fréttablaðinu segir Eiríkur Bergmann að val flokksmanna á því hvor verður formaður muni líklega að stóru leyti snúast um hvor sé líklegri til að koma flokknum í ríkisstjórn eftir kosningar. Það sé augljóst að Sigmundur Davíð sé umdeildasti stjórnmálamaður landsins og leiðtogar annarra flokka myndu kjósa að vinna með einhverjum öðrum en honum.
„Sigurður Ingi hefur hins vegar reynst sitja á friðarstóli sem forsætisráðherra og virðist njóta trausts og virðingar annarra forystumanna í stjórnmálum. Það skiptir máli í því mati sem Framsóknarmenn standa frammi fyrir.“