„Nú er rannsóknum að mestu lokið og meinið fundið og staðsett.“

Á þessum orðum hefst pistill á Facebook síðu Stefáns Karls Stefánssonar, leikara, en hann var lagður inn á sjúkrahús um síðustu helgi vegna alvarlegra veikinda.

Eiginkona hans, Steinunn Ólína Þorsteinsdóttir, greindi frá veikindum Stefáns fyrr í vikunni en hann er með æxli sem veldur þrengingum í gallvegi og brisgöngum.

Ekki er vitað á þessari stundu hvort meinið sé illkynja eða góðkynja.

Stefán greinir frá því í dag að æxlið virðist ekki vera stórt og vel skurðtækt, „sem eru bestu fréttir sem ég hef fengið.“

Í dag fer Stefán heim af spítalanum og verður þar fram að aðgerðardegi þann 4. október næstkomandi.

Stefán segir kveðjur um bata, styrk og bænir hafa hjálpað sér gríðarlega mikið að takast á við þetta mikla áfall sem muni án efa breyta lífi hans til frambúðar.

„Ég er hinsvegar fullur af jákvæðni og bjartsýni og tek ekki annað í mál en að koma eftir hlé og láta ykkur hlægja ennþá meir en fyrir hlé.“