Tónlistarmaðurinn góðkunni liggur ekki á skoðunum sínum í viðtali við Rolling Stone
Tónlistarmaðurinn góðkunni Bruce Springsteen liggur ekki á skoðunum sínum í viðtali við Rolling Stone-tímaritið. Þar fer þessi 67 ára gamli tónlistarmaður um víðan völl og tjáir sig meðal annars um forsetaslaginn í Bandaríkjunum þar sem Hillary Clinton og Donald Trump takast á.
Springsteen vandar Donald Trump, forsetaefni Repúblikana, ekki kveðjurnar í viðtalinu og segir hann að kosningabarátta hans sé „harmleikur fyrir lýðræðið“ og segir að Repúblikökunum sé haldið í gíslingu af „hálfvita“.
Springsteen hefur aldrei farið leynt með sínar pólitísku skoðanir en hann var dyggur stuðningsmaður Baracks Obama í kosningabaráttu hans. Þá studdi hann John Kerry í baráttunni um Hvíta húsið árið 2004 og samdi meðal annars lag honum til stuðnings.
„Þegar þú ert farinn að tala um að kosningum verði hagrætt ertu kominn út á mjög vafasama braut,“ segir Springsteen en Trump lét að því liggja í viðtali við Fox í ágústmánuði að niðurstöðum kosninganna í haust yrði hagrætt. Þetta segir Springsteen að sé hættulegt lýðræðinu enda eru opnar og gagnsæjar kosningar einn af hornsteinum þess.
Þá gagnrýndi hann málflutning Trumps á ýmsum sviðum í kosningabaráttu hans og sagði að hann kæmi með einföld svör á flóknum og margslungnum hlutum.
Springsteen hefur ekki lýst yfir stuðningi við Hillary Clinton opinberlega en segir að hún verði eflaust góður forseti, fari svo að hún nái kjöri.