Heimilisofbeldi, ölvunarakstur og innbrot
Tveir karlmenn í Hafnarfirði óskuðu eftir aðstoð lögreglu og sjúkraliðs á níunda tímanum í morgun eftir að hafa tekið inn sveppi. Mennirnir fundu fyrir vanlíðan, að sögn lögreglu.
Í dagbók lögreglu, vegna verkefna seinni hluta nætur og morguns, kemur fram að rétt fyrir klukkan sex í morgun hafi karlmaður í Fossvogi tilkynnt að vinur sinn væri að sveifla skotvopni eftir gleðskap næturinnar. Við frekari eftirgrennslan lögreglu kom í ljós að þetta átti ekki við rök að styðjast en húsráðandi hélt á hníf er lögregla kom á vettvang. Maðurinn var yfirbugaður og handtekinn í kjölfarið. Hann verður yfirheyrður síðar í dag.
Lögregla handtók karlmann á sjötta tímanum í morgun vegna gruns um ölvunar- og fíkniefnaakstur.
Þá fékk lögregla tvær tilkynningar með skömmu millibili á níunda tímanum í morgun er vörðuðu ógæfumenn. Tilkynnt var um útigangsmann sem hafði komist inn í kjallara í sameign í vesturbænum og væri þar sofandi. Manninum var vísað út. Skömmu síðar var tilkynnt um um ógæfumann sem svæfi ölvunarsvefni á stigagangi í fjölbýlishúsi í austurborginni. Honum var sömuleiðis vísað út.
Rétt fyrir klukkan 10 í morgun var lögreglu tilkynnt um innbrot í austurborginni og er málið í rannsókn.
Klukkan hálf sex í morgun var tilkynnt um umferðaróhapp í hringtorgi í Hafnarfirði. Tilkynningunni fylgdi að ökumaðurinn væri að ganga í burtu frá vettvangi. Maðurinn var handtekinn stutt frá vettvangi eftir ábendingu frá vitni og er hann grunaður um að hafa verið ölvaður undir stýri. Hann gistir nú í fangageymslu og verður yfirheyrður síðar í dag.
Loks var óskað eftir aðstoð lögreglu að heimili í Garðabæ vegna heimilisofbeldis í morgun. Þrír voru handteknir á vettvangi vegna líkamsárásar og verða yfirheyrðir síðar í dag. Þá var sömuleiðis óskað eftir lögregluaðstöð á heimili í Grafarvogi vegna heimilisofbeldis. Karlmaður var handtekinn í kjölfarið vegna líkamsárásar og verður hann yfirheyrður síðar í dag.