Lögreglan rannsakar hvort andlátið megi rekja til neyslu læknadóps
Lögreglan á höfuðborgarsvæðinu rannsakar nú hvort andlát íslenskrar konu aðfararnótt fimmtudags megi rekja til neyslu læknadóps.
Þetta kemur fram á Vísi.
Þar segir jafnframt að konan sem lést í heimahúsi hafi verið um þrítugt. Grunur leikur á að hún hafi misnotað lyfseðlisskyld lyf. Þá segir að rannsókn málsins sé skammt á veg komin.
Lögreglan vill ekki gefa upp hvaða lyf grunur leikur á að konan hafi misnotað.
Nú í lok ágúst sendi lögreglan á höfuðborgarsvæðinu út sérstaka viðvörun vegna verkjalyfsins Fentanýl. Þar sagði meðal annars.
„Fjölmörg dauðsföll á Norðurlöndunum eru rakin til notkunar á fentanýl, en lögreglan rannsakar nú andlát ungs manns á höfuðborgarsvæðinu um síðustu helgi þar sem grunur leikur á að umrætt lyf hafi komið við sögu.“
Í viðvörunni vísar lögreglan til dauðsfalls ungs manns sem lést á Menningarnótt eftir að hafa tekið inn of stóran skammt af fentanýli. Annar maður var hætt komin sömu nótt vegna lyfsins. Enn er beðið eftir endanlegri niðurstöðu í málunum.
Embætti landlæknis og lögreglan á höfuðborgarsvæðinu óttast misnotkun fólks á lyfsseðilsskyldum lyfjum. Svo virðist sem ungt fólk sé í auknum mæli farið að nota læknadóp sem gengur kaupum og sölum á svörtum markaði.