Héraðsdómur Reykjavíkur hefur dæmt rúmlega tvítugan karlmann í þriggja mánaða skilorðsbundið fangelsi fyrir tollalaga-, lyfjalaga- og fíkniefnabrot.

Lögreglan stöðvaði bifreið mannsins þann 3. ágúst 2015. Lögreglumenn fundu kannabislykt í bifreiðinni og í kjölfarið framvísaði maðurinn fimm plastpokum sem innihéldu um eitt gram af kannabisefnum hver. Lögregla fann sex poka til viðbótar og þrjú glös með ætluðum sterum. Þá hafi fundist peningar sem grunur lék á að væru tilkomnir vegna sölu á efnunum.

Í kjölfarið var gerð húsleit á heimili mannsins og þar fundust rúm 70 grömm af marijúna, peningakassi með rúmum 500 þúsund krónum og grammavog. Þá fundust sterar á heimili mannsins.

Samtals lagði lögreglu hald á 73,23 grömm af marijúana, 70 ml af testosteron, 90 ml af nandrolon, 60 ml af sustanon, 60 ml af trenbolun, 100 töflur af danabol, 300 töflur af metyltestosteron, 50 töflur af oxandrolon, 120 töflur af tamoxifen og 400 töflur af winstrol auk 604 þúsund króna í reiðufé.

Maðurinn játaði sakarefni að hluta. Hann játaði að hafa haft hin ólöglegu fíkniefni og stera í vörslu sinni en neitar því að hafa verið með efnin í sölu- og dreyfingarskyni.

Dómari mat það svo að framburður mannsins væri ótrúvegur og var niðurstaðan þriggja mánaða fangelsi. Dómurinn er skilorðsbundinn til tveggja ára. Auk þess voru fíkniefnin og sterarnir gerðir upptækir sem og peningar að fjárhæð 568 þúsund krónur sem er ætlaður ávinnungur mannsins af sölu fíkniefna og stera.

Loks var manninum gert að greiða málsvarnarlaun skipaðs verjanda síns, 716 þúsund krónur.