Konur ekki í sama áhættuhópi
Karlmenn sem þjást af miklum kvíða eru tvisvar sinnum líklegri að deyja úr krabbameini heldur en þeir sem ekki glíma við kvíða. Þetta kemur fram í niðurstöðum nýrrar rannsóknar. Þar segir jafnframt að konur með kvíðaröskun séu ekki í sama áhættuhópi.
Ástæðan fyrir því er sú að karlmenn með kvíðaröskun eru mun líklegri en konur til að reykja og neyta áfengis og annarra vímugjafa í þeim tilgangi að „róa taugarnar“ heldur en konur.
Þessi svokallaða sjálfslækningaraðferð eykur líkurnar á að fá krabbamein umtalsvert.
Að auki segir í niðurstöðum rannsóknarinnar að konur fari mun fyrr til læknis heldur en karlmenn ef þeim grunar að eitthvað bjáti á. Þannig finnst krabbameinið fyrr í konum en körlum og því líklegra að hægt sé að lækna það.
Tæplega 16 þúsund Bretar tóku þátt í rannsókninni sem stóð yfir í 15 ár. Háskólinn í Cambridge hélt utan um rannsóknina sem var styrkt af læknavísinda-stofnuninni, Medical Research Council, og breska krabbameinsrannsóknarsjóðnum, Cancer Research UK found.
Olivia Remes, sem er prófessor í geðheilbrigði við háskólann hélt erindi um niðurstöðurnar í síðustu viku. Þar sagðir hún að fyrri rannsóknir á orsakasambandi kvíða og krabbameins hefðu verið ófullnægjandi. Rannsókn Cambridge háskólans væri sú stærsta á þessu sviði hingað til.
„Niðurstöður okkar eru þær að karlmenn með kvíðaröskun eru tvisvar sinnum líklegri að deyja úr krabbameini heldur en þeir karlmenn sem eru ekki með kvíðaröskun. Samband þarna á milli finnst hinsvegar ekki hjá konum.“
Hún sagði jafnframt að lækna- og fræðasamfélagið þurfi að fylgjast betur með karlmönnum með kvíðaröskun og gefa þessum hópi mun meiri gaum en áður.