MMR kannaði afstöðu Íslendinga
Meirihluti Íslendinga er andvígur því að merkingar fyrir kyn verði fjarlægðar af salernum á almenningsstöðum. MMR kannaði afstöðu Íslendinga á dögunum.
52 prósent þeirra sem tóku afstöðu voru andvíg því að slíkar merkingar yrðu fjarlægðar en einungis 21,4 prósent Íslendinga kváðust vera fylgjandi og þar af um helmingur mjög fylgjandi.
Í frétt á vef MMR, þar sem má sjá niðurstöðurnar í heild sinni, kemur fram að nokkuð mikill munur hafi verið á afstöðu hópa eftir lýðfræðihópum.
Þannig voru yngri aldurshópar líklegri en eldri aldurshópar til að vera fylgjandi því að kynjamerkingar yrðu fjarlægðar af almenningssalernum. 33,6 prósent fólks á aldrinum 18 til 29 ára sagðist fylgjandi á meðan 9,6 prósent fólks 68 ára og eldri sagðist fylgjandi.
Þá vekur það athygli að námsmenn voru áberandi líklegri til að vera fylgjandi en aðrir hópar. Þannig kváðust 44,1% þeirra kváðust fylgjandi og 26,8% andvíg. Fólk búsett á höfuðborgarsvæðinu (24,3%) reyndist jafnframt líklegra til að vera fylgjandi heldur en fólk á landsbyggðinni (16,2%).
Þegar afstaða er skoðuð eftir stjórnmálaflokkum sést að stuðningsfólk Pírata er lang líklegast til að vera fylgjandi (44%). Stuðningsfólk Framsóknar og Sjálfstæðisflokksins eru áberandi líklegust til að vera andvíg en einungis 9% Framsóknarmanna og 11,5% Sjálfstæðismanna reyndust fylgjandi því að merkingar fyrir kyn væru fjarlægar af salernum á almenningsstöðum.
905 einstaklingar, 18 ára og eldri, svöruðu könnun MMR sem var framkvæmd dagana 13. til 19. september.