Allsherjarþing Sameinuðu þjóðanna bregst við auknu sýklaónæmi
Búist er við því að allar 193 aðildarþjóðir allsherjarþings Sameinuðu þjóðanna muni skrifa undir yfirlýsingu sem hefur það að markmiði að berjast af fullum þunga við þá hættu sem stafar af lyfjaónæmum sýklum. Þetta mál og fleiri til hafa komið til umræðu á allsherjarþingi Sameinuðu þjóðanna.
„Það hljómar ef til vill kaldhæðnislega að eitthvað sem er svo smátt í sniðum geti valdið svo miklum skaða,“ sagði Jeffrey LeJeune, prófessor við Ohio State University og vísaði þar í sýklaónæmar bakteríur sem bregðast ekki við sýklalyfjum. „En þetta er alheimsógn sem ber að taka alvarlega.“
Talið er að 700 þúsund manns deyi á ári hverju af völdum sýklaónæmra baktería. Yfirlýsingin sem aðildarþjóðir allsherjarþingsins munu skrifa undir er sambærileg þeim sem notaðar hafa verið vegna ástandsins í loftslagsmálum og munu aðildarþjóðirnar gefa skýrslu um stöðu mála innan tveggja ára og hvernig hefur gengið í baráttunni gegn þessum vágesti.
Sem fyrr segir er talið að um 700 þúsund manns deyi á ári hverjum af völdum sýklaónæmra baktería. Ekki er útilokað að þessi tala segi ekki alla söguna þar sem enginn miðlægur gagnagrunnur heldur utan um dauðsföll af þessum völdum. Dauðsföllin gætu því verið miklu fleiri.
Margir áratugir eru síðan fyrst var farið að vara við hugsanlegum afleiðingum vegna sýklaóæmra baktería. Alexander Fleming, maðurinn sem fann upp pensilínið, sagði á sínum tíma að hættulegt væri að taka of lítinn skammt af sýklalyfjum, skammt sem ekki dugar til að drepa bakteríurnar. Það myndi hafa þá hættu í för með sér að bakteríur myndu mynda ónæmi gegn þessum lyfjum. Og það er nákvæmlega það sem hefur gerst undanfarna áratugi.
Samkvæmt yfirlýsingunni á allsherjarþingi Sameinuðu þjóðanna skuldbinda þjóðir sig til þess að vekja athygli almennings á hættunni sem stafar af sýklaónæmi. Þá verði þrýst á aukna nýsköpun í lyfjaiðnaði sem hefur það að marki að þróa ný lyf sem gagnast í baráttunni gegn sýklaónæmi. Loks verði miðlægum gagnagrunni komið upp svo hægt verði að halda betur utan um þróunina í þessum efnum.
