Einar K. Guðfinnsson, forseti Alþingis, sagði við upphaf þingfundar í gær, mánudag, að skýrsla meirihluta fjárlaganefndar Alþingis, Einkavæðing bankanna hin síðari, væri ekki skýrsla í skilningi þingskapa. Vísaði Einar til þess að skýrslan, sem Vigdís Hauksdóttir, formaður fjárlaganefndar, og Guðlaugur Þór Þórðarson, varaformaður, greiddu fyrir úr eigin vasa, hefði ekki verið tekin til umfjöllunar í nefndinni og því ekki afgreidd úr henni.

Margir þingmenn stjórnarandstöðuflokkanna gagnrýndu afgreiðslu Einars harðlega. Fullyrtu þeir að kynning hennar á sérstökum blaðamannafundi hefði falið í sér misnotkun á nefndinni og Alþingi. Bjarkey Gunnarsdóttir, þingmaður Vinstri grænna, fór fram á að skýrslan yrði dregin til baka og þeir sem bornir hefðu verið þungum sökum yrðu beðnir afsökunar. Guðlaugur Þór sagði enga sérfræðinga eða embættismenn hafa verið borna sökum í skýrslunni.