Yfirvöld í Norður-Kóreu hafa tekið af lífi æðsta embættismann menntamála í landinu, Kim Yong Jin. Kim er sagður hafa verið leiddur fyrir aftökusveit og var hann skotinn til bana.

CNN greinir frá þessu.

Óvíst er hvað Kim vann sér til saka, en í frétt CNN er þess þó getið að hann hafi verið þyrnir í augum æðstu embættismanna landsins vegna skoðana sinna og viðmóts. Þá hafa fjölmiðlar greint frá því að steininn hafi tekið úr þegar hann sofnaði á norðurkóreska þinginu ekki alls fyrir löngu. Talsmaður samræmingarráðuneytisins í Suður-Kóreu staðfesti að Kim hefði verið tekinn af lífi.

Yfirvöld í Norður-Kóreu refsuðu einnig tveimur öðrum embættismönnum, en þeir hlutu þó ekki sömu örlög og Kim. Annar þeirra var dæmdur til erfiðisvinnu, að því er CNN greinir frá, en hinn var dæmdur til að sækja sérstakt endurhæfingarnámskeið fyrir þá sem gerst hafa sekir um afglöp í starfi.