Ný könnun frá MMR um fylgi flokkanna
Sjálfstæðisflokkurinn og Píratar eru stærstu stjórnmálaflokkar landsins, samkvæmt nýrri könnun MMR. Fylgi Sjálfstæðisflokksins mælist nú 24,6 prósent en fylgi Pírata mælist 22,4 prósent.
Sjálfstæðisflokkurinn er á svipuðum slóðum og í síðustu könnun sem framkvæmd var upp úr miðjum júlímánuði. Þá var fylgi flokksins 24,0 prósent. Píratar tapa aftur á móti talsverðu fylgi, en í síðustu könnun MMR var fylgið 26,8 prósent.
Fylgi Vinstri-grænna stendur nú í 12,4 prósentum samanborið við 12,9 prósent í síðustu könnun. Vinstri-grænir voru á miklu skriði í byrjun sumars, en í júlíbyrjun mældist fylgi flokksins 18,0 prósent. Framsóknarflokkur bætir við sig og er nú með 10,6 prósenta fylgi, borið saman við 8,3 prósent í síðustu könnun og 6,4 prósent þar áður.
Samfylkingin mælist með 9,1 prósents fylgi og bætir lítillega við sig frá síðustu könnun þegar fylgið mældist 8,4 prósent. Viðreisn mælist með 8,8 prósenta fylgi samanborið við 9,4 prósent í síðustu könnun. Björt framtíð mælist með 4,5 prósenta fylgi en var með 3,9 prósent í síðustu könnun.
Fylgi annarra flokka mælist undir tveimur prósentum.
Könnun MMR var framkvæmd dagana 22. til 29. ágúst og var svarfjöldi 949 einstaklingar, 18 ára og eldri.