Geta fengið samtals allt að 1.500 milljónir í bónusgreiðslur
Nú rétt í þessu, á aðalfundi eignarhaldsfélags Kaupþings á Hilton Nordica, var samþykkt tillaga um bónuskerfi til handa hópi starfsmanna og verktaka félagsins sem geta fengið samtals allt að 1.500 milljónir í bónus sem verður greiddur út ekki síðar en í apríl 2018.
Var tillagan samþykkt með miklum meirihluta atkvæða þeirra hluthafa sem mættu til fundarins en samkvæmt upplýsingum DV greiddi fulltrúi Eignasafns Seðlabanka Íslands, sem á 6 prósent hlut í Kaupþingi, hins vegar atkvæði gegn tillögu stjórnarinnar um bónuskerfi. Þá greiddi fulltrúi frá þrotabúi Baugs einnig atkvæði gegn tillögunni.
Sá hópur starfsmanna sem mun eiga rétt á slíkum bónusgreiðslum frá Kaupþingi verður um og yfir 20 manns. Að stórum hluta er um að ræða sömu starfsmenn og fengu bónus í sinn hlut í kjölfar þess að Kaupþing lauk nauðasamningum um síðastliðin áramót.
Í sumum tilfellum geta lykilstarfsmenn vænst þess að fá yfir 100 milljónir króna í bónus, samkvæmt heimildum DV, takist þeim að ná tilteknum markmiðum sem miða að því að hámarka virði óseldra eigna Kaupþings og þar með endurheimtur kröfuhafa félagsins. Stærsta einstaka eign Kaupþings er 87% hlutur í Arion banka.
Þó nokkrir þingmenn gagnrýndu bónusgreiðslurnar harðlega á Alþingi í dag. En líkt og áður hefur komið fram fara þær aðeins til örfárra lykilstarfsmanna og stjórnenda fjármálafyrirtækja.
Þorsteinn Sæmundsson, þingmaður Framsóknarflokksins, leggur til að 90 til 98 prósenta skattur verði lagður á ofurbónusgreiðslurnar. Hann bendir á að bónusarnir jafnist á við ársveltu lítilla fyrirtækja.