Tilkynningin kemur í kjölfar afhjúpunar New York Post
Huma Abedin, aðstoðarkona Hillary Clinton, forsetaefnis Demókrata fyrir forsetakosningarnar í Bandaríkjunum í haust, hefur staðfest að hún ætli að skilja við eiginmann sinn, stjórnmálamanninn Anthony Weiner.
Tilkynningin kemur skömmu eftir að greint var frá því að Weiner hefði sent klúra ljósmynd af sér til ónafngreindrar konu. Á myndinni var hann í nærbuxunum einum fata og lá ungur sonur þeirra hjóna við hlið hans. Þetta er ekki í fyrsta sinn sem upp kemst um ósiðlegt athæfi eða óeðlileg samskipti Weiners við konur.
Árið 2011 sagði hann af sér þingmennsku í fulltrúadeild Bandaríkjaþings í kjölfar kynlífshneykslis. Hann er demókrati og var talinn líklegur til afreka innan flokksins áður en að þessu kom. Hann viðurkenndi að hafa haft óviðeigandi samskipti við sex konur en neitaði þó að hafa átt í kynferðislegu sambandi við þær.
Árið 2013 bauð hann sig fram til borgarstjóra New York-borgar og þá var aftur greint frá því að hann hefði átt í ósiðlegum samskiptum við konur í gegnum netið. Nú virðist steininn hafa tekið úr eftir að New York Post greindi frá kynferðislegum samskiptum og myndum sem hann sendi hann konu árið 2015.
Í yfirlýsingu sem Abedin hefur sent frá sér kemur fram að eftir vandlega íhugun, og mikla vinnu við að reyna að láta hjónabandið ganga upp, hafi hún ákveðið að skilja við Weiner. Weiner og Abedin trúlofuðu sig árið 2009 og gengu í hjónaband árið 2010.