Lögreglan á höfuðborgarsvæðinu handtók tvo erlenda menn við Skarfabakka rétt fyrir hádegi í dag. Í dagbók lögreglu kemur fram að mennirnir hafi verið að reyna að komast um borð í erlent skemmtiferðaskip. Að sögn lögreglu voru mennirnir komnir inn á lokað svæði við skipið og voru að reyna að komast um borð þegar þeir voru handteknir.

Mennirnir voru vistaðir í fangageymslu lögreglu, en þeir eru sagðir vera 16 og 17 ára gamlir. Af þeirri ástæðu var Barnavernd kynnt málið.

Lögregla hafði svo á fjórða tímanum í dag afskipti af manni sem var í annarlegu ástandi við Hringbraut. Hann var sagður ósjálfbjarga vegna vímu og var hann vistaður í fangageymslu meðan ástand hans lagast.

Um ellefu leytið í morgun var tilkynnt um mann í annarlegu ástandi við Smáralind. Hann var ekki viðræðuhæfur vegna ástands, að sögn lögreglu, og var hann vistaður í fangageymslu lögreglu.

Þá var tilkynnt um slys í sundlaug rétt fyrir hádegi í dag. Þar hafði maður dottið utan í skilit og fengið skurð á bakið. Maðurinn var fluttur með sjúkrabifreið á slysadeild, en að sögn lögreglu komst lögregla ekki á vettvang vegna anna.

Loks var tilkynnt um eignaspjöll við Vættaskóla um eitt leytið í dag. Þar höfðu þrjár stórar rúður verið brotnar.