Einn ástsælasti tónlistarmaður þjóðarinnar, Gunnar Þórðarson, hefur óskað eftir því að lag hans, Gamli bærinn minn, verði ekki flutt þegar hátíðin Ljósanótt fer fram í Reykjanesbæ eins og venjan hefur verið.

Gunnar, sem sleit barnskónum í Keflavík, segir í tilkynningu sem hann sendi Víkurfréttum að hann sé ósáttur við framkomu Reykjanesbæjar í máli sem tengist fjölskyldu hans.

„Samskipti fjölskyldu minnar við eina af undirstofnunum Reykjanesbæjar er með þeim ólíkindum að ég banna flutning lagsins á Ljósanótt. Þetta er ekki gamli bærinn minn,“ segir Gunnar í tilkynningunni. Hann fer ekki nánar út í við hvaða samskipti hann er ósáttur við.

Lagið hefur verið flutt á laugardagskvöldi Ljósanætur þegar flugeldasýningin fer fram.