Gera má betur til að bjóða upp á valfrelsi í heilbrigðismálum
Hildur Sverrisdóttir, borgarfulltrúi Sjálfstæðisflokksins, sér ekkert athugavert við að fólk geti greitt fyrir það að fá betri heilbrigðisþjónustu. Þetta segir Hildur í viðtali í Fréttablaðinu í dag en hún stefnir sem kunnugt er á þing fyrir Sjálfstæðisflokkinn í kosningunum í haust.
Í viðtalinu segir Hildur að gera megi betur í að bjóða upp á valfrelsi í velferðarmálum. „Við sjálfstæðismenn höfum haft þá skoðun lengi að það sé í lagi, og það halli ekki á neinn, þó að við bjóðum upp á aukna þjónustu varðandi eitthvað sem þá kostar. Þessi tiltekna þjónusta hefði hvort sem er aldrei verið í boði hjá hinu opinbera en það væri hægt að kaupa sér aukaþjónustu og fá þannig peninga inn í kerfið til að standa betur að þeirri grunnþjónustu sem við viljum tryggja,“ segir Hildur meðal annars.
Hún spyr einnig hvers vegna heilbrigðiskerfið sé svo heilagt að ekki megi taka áhættu og finna upp á einhverju nýju ef það heitir velferð og heilbrigðiskerfi. Við stöndum í útflutningi á hugviti og spyr hún af hverju ekki megi sýna sömu hugmyndaauðgi og sköpun í heilbrigðismálum.
„Við erum alltaf að tala um mikilvægi þess að fólk fái að taka áhættu og vera í viðskiptum til að halda úti atvinnu. Mér finnst óþarfa viðkvæmni og pínu hættulegt ef það á að halda því til streitu að ekkert af þessu megi gera ef það tengist heilbrigðiskerfinu,“ segir Hildur.