Stórhættulegt lyf sem getur valdið dauða
„Lögreglan á höfuðborgarsvæðinu minnir á að notkun verkjalyfsins fentanýl skal ávallt vera í samráði við lækni.“ Þetta segir í tilkynningu frá lögreglunni sem kemur í kjölfar fregna af manni sem hneig niður í miðborg Reykjavíkur um helgina. Síðar um kvöldið lést vinur mannsins á heimili sínu. Grunur leikur á að mennirnir hafi báðir neitt fentanýl sem er rótsterkt lyfseðilsskylt lyf.
Í tilkynningu lögreglunnar segir að Fentanýl er mjög sterkt verkjalyf og getur valdið dauða hjá þeim sem kunna ekki með það að fara.
„Fjölmörg dauðsföll á Norðurlöndunum eru rakin til notkunar á fentanýl, en lögreglan rannsakar nú andlát ungs manns á höfuðborgarsvæðinu um síðustu helgi þar sem grunur leikur á að umrætt lyf hafi komið við sögu.“
Lögreglan hefur jafnframt áhyggjur að fentanýl kunni að ganga hér kaupum og sölum í formi dufts, kristalla og taflna.
„Vitað er að fentanýl er boðið til sölu á netinu hjá aðilum í Asíu og Suður-Ameríku. Lögreglan ítrekar að fentanýl er mjög sterkt verkjalyf og því stórhættulegt í höndum þeirra sem kunna ekki með það að fara og á einvörðungu að nota í samráði við lækni.“