38 látnir eftir skjálftann á Ítalíu í nótt.
„Ég heyri barnið öskra undir rústunum,“ er haft eftir ljósmyndaranum Emiliano Grillotti, sem er einn þeirra sem hefur tekið myndir á vettvangi á Ítalíu í dag.
Sífellt fleiri finnast látnir eftir öflugan jarðskjálfta sem varð á Ítalíu í nótt. Hann mældist 6,2 á Ricter og átti upptök sín á 10 kílómetra dýpi í 76 kílómetra akstursfjarlægð suðaustur af borginni Perugisa. Skjálftans var vart allt frá Bologna í norðri til Napoli í suðri. Hann stóð yfir í rúmar 20 sekúndur.
Tala látinna stendur nú í 38 en en um 150 manns er saknað. Grillotti sá um 15 manns grafa með berum höndum eftir fjölskyldu sem varð undir húsi sínu í skjálftanum. Hann heyrði annað barnið í fjölskyldunni öskra undir rústunum, á meðan björgunarmenn grófu eftir mætti.
Skjálftinn er sá stærsti á ítalíu síðan í apríl 2009, þegar skjálfti af stærðinni 6,3 reið yfir landið. Þá létust 296 auk þess sem þúsund særðust. Flest ef ekki öll fórnarlömbin búa í bæjum í fjallendi Lazio- og Marche-héraðs.
„Vegirnir inn og út úr bænum eru í sundur. Hálfur bærinn er horfinn. Það er fólk hérna undir rústunum. Það hafa verið aurskriður og við óttumst að brú hérna gæti hrunið,“ er haft eftir Sergio Pirozzi, bæjarstjóra í Amatrice.
Meðfylgjandi myndir voru teknar í morgun og í dag af ljósmyndurum EPA.
