Mennirnir tveir sem voru handteknir og færðir til yfirheyrslu í sumar í tengslum við rannsókn setts saksóknara á hvarfi Guðmundar Einarssonar neita allri aðkomu að hvarfinu.

Þetta kemur fram á vef RÚV

Guðmundur hvarf sporlaust eftir dansleik í Hafnarfirði þann 27. janúar árið 1974 og hefur ekki sést síðan. Í frétt RÚV kemur fram að lögregla hafi nú lokið rannsókn á meintum þætti mannanna tveggja að hvarfi Guðmundar. Þá segir að settur saksóknari í Guðmundar- og Geirfinnsmálinu hafi sent endurupptökunefnd rannsóknargögn og fer hún nú yfir og skoðar hvort þau gefi tilefni til frekari rannsóknar.

Eins og frægt er orðið voru sex einstaklingar dæmdir í Guðmundar- og Geirfinnsmálinu, þeirra á meðal Sævar Ciesielski. Í frétt RÚV segir að gögn sem settur saksóknari hafi undir höndum varpi ljósi á hvernig Sævar var bendlaður við hvarfið á Guðmundi á sínum tíma.

Þá er haft eftir Birni L. Bergssyni, formanni endurupptökunefndar, að ekki standi til að rannsaka kenningu þess efnis að Geirfinnur Einarsson hafi látist í umferðarslysi á Keflavíkurvegi líkt og fram kemur í bók Ómars Ragnarssonar. Ástæðan sé einfaldlega sú að Ómari hafi lýst því yfir að hann muni ekki nöfn þeirra sem sögðu honum þá sögu.